Sa gitna ng matinding epekto ng pandemya at ang hamon ng Distance Learning sa mga mag-aaral, umabot sa mahigit na 26.5 milyon ang pumasok sa paaralan sa taong ito ayon sa Departamento ng Edukasyon (DepEd).
Bawat paaralan ay sumailalim sa isang birtual na pagpupulong tungkol sa iba’t ibang Learning Delivery Modalities na maaring gayahin at gamitin ng bawat paaralan. Ang ilan sa mga ito ay ang Modular Distance Learning, Online Distance Learning at Radio- Based Instruction.
Matapos ang una at ikalawang markahan ay nakita na nahihirapan ang mga estudyante sa pagsagot ng kanilang mga modyul o SLM dahil sa kanilang naging grado. Dahil dito, ay isinulong ang pagkakaroon ng Radio- Based Instruction sa mga paaralan upang magsilbing gabay sa kanilang pag-aaral.
Ang Radio-Based Instruction ay nagbigay suporta sa mga mag-aaral sa pamamagitan ng pakikinig sa kanilang mga guro. Mula sa pakikinig ay nauunawaan nila ang mga tampok na aralin. Nakatulong din ito para mabawasan ang mga printed modules dahil ang aralin ay binabasa at ipinapaliwanag ng guro sa radyo.
Naging madali ang pagpapatupad ng RBI dahil may mga stakeholders na nagbigay ng donasyon at mga radyo gaya ng Local Government Unit (LGU) bilang suporta sa RBI upang mapalawig ang pakikinig ng mga mag-aaral.
Ang edukasyon sa mga mag-aaral ay hindi lamang tungkulin ng gobyerno at ng paaralan kundi ito ay responsibilidad ng lahat. Ang bawat institusyon ng lipunan ay kaakibat ng paaralan sa paghubog sa kasanayan, kakayahan at pagkatao ng bawat mag-aaral na Pilipino.
Marapat lamang na suportahan ang paaralan sa kanyang mga proyekto na tutulong sa mga mag-aaral upang sa gitna ng pandemya ay maihatid pa rin ang isang dekalidad na edukasyon na siyang sandigan ng mga susunod na henerasyon para sa isang magandang kinabukasan.
Caluluan High School Main 